+ AVESTA

-	Yasna
-	Khordeh Avesta
-	Visperad
-	Vendidad
-	Fragments

- 101 NAMES

- ANGELS

- CALENDAR

Chapter 1.

(zôt u râspî,)

1. nivaêdhayemi hañkârayemi dathushô ahurahe mazdå raêvatô hvarenanguhatô mazishtaheca vahishtaheca sraêshtaheca xraozhdishtaheca xrathwishtaheca hukereptemaheca ashât apanôtemaheca hudhâmanô vouru-rafnanghô ýô nô dadha ýô tatasha ýô tuthruyê ýô mainyush speñtôtemô.

2. nivaêdhayemi hañkârayemi vanghave mananghe ashâi vahishtâi xshathrâi vairyâi speñtayâi ârmatêe haurvatbya ameretatbya gêush tashne gêush urune âthre ahurahe mazdå ýaêtushtemâi ameshanãm speñtanãm!

3. nivaêdhayemi hañkârayemi asnyaêibyô ashahe ratubyô, hâvanêe ashaone ashahe rathwe, nivaêdhayemi hañkârayemi sâvanghêe vîsyâica ashaone ashahe rathwe, nivaêdhayemi hañkârayemi mithrahe vouru-gaoyaotôish hazangrô-gaoshahe baêvare-cashmanô aoxtô-nâmanô ýazatahe râmanô hvâstrahe!

4. (zôt,) nivaêdhayemi hañkârayemi rapithwinâi ashaone ashahe rathwe, nivaêdhayemi hañkârayemi frâdat-fshave zañtumâica ashaone ashahe rathwe, nivaêdhayemi hañkârayemi ashahe vahishtahe âthrasca ahurahe mazdå.

5. nivaêdhayemi hañkârayemi uzayeirinâi ashaone ashahe rathwe, nivaêdhayemi hañkârayemi frâdat-vîrâi dâh'yumâica ashaone ashahe rathwe, nivaêdhayemi hañkârayemi berezatô ahurahe nafedhrô apãm apasca mazdadhâtayå.

6. nivaêdhayemi hañkârayemi aiwisrûthrimâi aibigayâi ashaone ashahe rathwe, nivaêdhayemi hañkârayemi frâdat-vîspãm- hujyâtêe zarathushtrôtemâica ashaone ashahe rathwe, nivaêdhayemi hañkârayemi ashâunãm fravashinãm khenãnãmca vîrô-vãthwanãm ýâiryayåsca hushitôish, amaheca hutâshtahe huraodhahe verethrakhnaheca ahuradhâtahe vanaiñtyåsca uparatâtô.

7. nivaêdhayemi hañkârayemi ushahinâi ashaone ashahe rathwe, nivaêdhayemi hañkârayemi berejyâi nmânyâica ashaone ashahe rathwe, nivaêdhayemi hañkârayemi sraoshahe ashyehe ashivatô verethrâjanô frâdat-gaêthahe, rashnaosh razishtahe arshtâtasca frâdat-gaêthayå varedat-gaêthayå!

8. nivaêdhayemi hañkârayemi mâhyaêibyô ashahe ratubyô, añtaremånghâi ashaone ashahe rathwe, nivaêdhayemi hañkârayemi perenô-månghâi vîshaptathâica ashaone ashahe rathwe!

9. nivaêdhayemi hañkârayemi ýâiryaêibyô ashahe ratubyô, maidhyôizaremayâi ashaone ashahe rathwe, nivaêdhayemi hañkârayemi maidhyôishemâi ashaone ashahe rathwe, nivaêdhayemi hañkârayemi paitishhahyâi ashaone ashahe rathwe, nivaêdhayemi hañkârayemi ayâthrimâi fraourvaêshtrimâi varshniharshtâica ashaone ashahe rathwe, nivaêdhayemi hañkârayemi maidhyâiryâi ashaone ashahe rathwe, nivaêdhayemi hañkârayemi hamaspathmaêdayâi ashaone ashahe rathwe, nivaêdhayemi hañkârayemi saredhaêibyô ashahe ratubyô.

10. nivaêdhayemi hañkârayemi vîspaêibyô aêibyô ratubyô ýôi heñti ashahe ratavô thrayasca thrisãsca nazdishta pairishhâvanayô ýôi heñti ashahe ýat vahishtahe mazdô-frasâsta zarathushtrô- fraoxta!

11. nivaêdhayemi hañkârayemi ahuraêibya mithraêibya berezañbya aithyajanghaêibya ashavanaêibya stârãmca speñtô-mainyavanãm dâmanãm tishtryeheca stârô raêvatô hvarenanguhatô månghaheca gaocithrahe hvareca xshaêtahe aurvat-aspahe dôithrahe ahurahe mazdå mithrahe dâh'yunãm dainghupatôish, nivaêdhayemi hañkârayemi (...rôz...) ahurahe mazdå raêvatô hvarenanguhatô, nivaêdhayemi hañkârayemi ( ...mâh...) ashâunãm fravashinãm!

12. nivaêdhayemi hañkârayemi tava âthrô ahurahe mazdå puthra mat vîspaêibyô âterebyô, nivaêdhayemi hañkârayemi aiwyô vanguhibyô vîspanãmca apãm mazdadhâtanãm vîspanãmca urvaranãm mazdadhâtanãm!

13. nivaêdhayemi hañkârayemi mãthrahe speñtahe ashaonô verezyanguhahe dâtahe vîdaêvahe dâtahe zarathushtrôish darekhayå upayanayå daênayå vanghuyå mâzdayasnôish.

14. nivaêdhayemi hañkârayemi garôish ushidarenahe mazdadhâtahe ashahvâthrahe vîspaêshãmca gairinãm ashahvâthranãm pouru-hvâthranãm mazdadhâtanãm kâvayeheca hvarenanghô mazdadhâtahe ahvaretaheca hvarenanghô mazdadhâtahe, nivaêdhayemi hañkârayemi ashôish vanghuyå cistôish vanghuyå erethê vanghuyå rasãstâtô vanghuyå hvarenanghô savanghô mazdadhâtahe.

15. nivaêdhayemi hañkârayemi dahmayå vanghuyå âfritôish dahmaheca narsh ashaonô ukhraheca taxmahe dâmôish upamanahe ýazatahe!

16. nivaêdhayemi hañkârayemi ånghãm asanghãmca shôithranãmca gaoyaoitinãmca maêthananãmca avô- hvarenanãmca apãmca zemãmca urvaranãmca ainghåsca zemô avaingheca ashnô vâtaheca ashaonô strãm månghô hûrô anakhranãm raocanghãm hvadhâtanãm vîspanãmca speñtahe mainyêush dâmanãm ashaonãm ashaoninãmca ashahe rathwãm.

17. nivaêdhayemi hañkârayemi rathwô berezatô ýô ashahe, rathwãm ayaranãmca asnyanãmca mâhyanãmca ýâiryanãmca saredhanãmca ýôi heñti ashahe ratavô, hâvanôish rathwô!

18. nivaêdhayemi hañkârayemi ashâunãm fravashinãm ukhranãm aiwithûranãm paoiryô-tkaêshanãm fravashinãm nabânazdishtanãm fravashinãm havahe urunô fravashêe.

19. nivaêdhayemi hañkârayemi vîspaêibyô ashahe ratubyô, nivaêdhayemi hañkârayemi vîspaêibyô vanghudhâbyô ýazataêibyô mainyaoibyascâ gaêthyaêibyascâ ýôi heñti ýasnyâca vahmyâca ashât haca ýat vahishtât!

20. havane ashâum ashahe ratvô savanghe ashâum ashahe ratvô rapithwina ashâum ashahe ratvô uzayeirina ashâum ashahe ratvô aiwisrûthrima aibigaya ashâum ashahe ratvô ushahina ashâum ashahe ratvô.

21. ýezi thwâ didvaêsha ýezi manangha ýezi vacangha ýezi shyaothna ýezi zaosha ýezi azaosha, â-tê ainghe fraca stuyê nî-tê vaêdhayemi ýezi tê ainghe avâ-urûraodha ýat ýasnaheca vahmaheca.

22. ratavô vîspe mazishta ashâum ashahe ratavô ýezi vô didvaêsha ýezi manangha ýezi vacangha ýezi shyaothna ýezi zaosha ýezi azaosha, â-vô ainghe fraca stuyê nî-vô vaêdhayemi ýezi vô ainghe avâ-urûraodha ýat ýasnaheca vahmaheca! (zôt u râspî,)

23. fravarâne mazdayasnô zarathushtrish vîdaêvô ahura-tkaêshô hâvanêe ashaone ashahe rathwe ýasnâica vahmâica xshnaothrâica frasastayaêca, sâvanghêe vîsyâica ashaone ashahe rathwe ýasnâica vahmâica xshnaothrâica frasastayaêca, rathwãm ayaranãmca asnyanãmca mâhyanãmca ýâiryanãmca saredhanãmca ýasnâica vahmâica xshnaothrâica (râspî,) frasastayaêca!!

[NEXT]