About us / ClubDNA™ / History / Zoroastrian / Mehrdad™ / News / Blog / MyDNA™ / ChatMusic / 4U! / Shopping / Travel / Downloads / Services / Links / Contact us

 

 

ZOROASTRIAN    

Siroza 2 (*Dedications for the thirty days of the month)

 

 

+ AVESTA
-  Yasna
-  Khordeh Avesta
-  Visperad
-  Vendidad
-  Fragments

 

 

- 101 NAMES

- ANGELS

- CALENDAR

 
AVESTAN
1. ahurem mazdãm raêvañtem hvarenanguhañtô ýazamaide ameshâ speñtâ huxshathrâ hudhånghô ýazamaide.


2. vohu manô ameshem speñtem ýazamaide âxshtîm hãm-vaiñtîm ýazamaide taredhâtem anyâish dâmãn âsnem xratûm mazdadhâtem ýazamaide gaoshô-srûtem xratûm mazdadhâtem ýazamaide.


3. ashem vahishtem sraêshtem ameshem speñtem ýazamaide airyamanem ishîm ýazamaide sûrem mazdadhâtem ýazamaide saokãm vanguhîm vouru-dôithrãm mazdadhâtãm ashaonîm ýazamaide.


4. xshathrem vairîm ameshem speñtem ýazamaide ayôxshustem ýazamaide marzhdikem thrâyô-drikhûm ýazamaide.


5. speñtãm vanguhîm ârmaitîm ýazamaide râtãm vanguhîm vouru-dôithrãm mazdadhâtãm ashaonîm ýazamaide.


6. haurvatâtem ameshem speñtem ýazamaide ýâiryãm hushitîm ýazamaide saredha ashavana ashahe ratavô ýazamaide.


7. ameretatâtem ameshem speñtem ýazamaide fshaonîm vãthwãm ýazamaide aspinâca ýevînô ýazamaide gaokerenem sûrem mazdadhâtem ýazamaide,
(hâwan gâh:)
mithrem vouru-gaoyaoitîm ýazamaide râma hvâstrem ýazamaide,
(rapithwin gâh:)
ashem vahishtem âtremca ahurahe mazdå puthrem ýazamaide,
(uzîrin gâh:)
berezañtem ahurem xshathrîm xshaêtem apãm napâtem aurvat-aspem ýazamaide apemca mazdadhâtãm ashaonîm ýazamaide,
(aiwisrûthrim gâh:)
ashâunãm vanguhîsh sûrå speñtå fravashayô ýazamaide khenåsca vîrô-vãthwå ýazamaide ýâiryãmca hushitîm ýazamaide amemca hutashtem huraodhem ýazamaide verethrakhnemca ahuradhâtem ýazamaide vanaiñtîmca uparatâtem ýazamaide,
(ushahin gâh:)
sraoshem ashîm huraodhem verethrâjanem frâdat- gaêthem ashavanem ashahe ratûm ýazamaide rashnûm razishtem ýazamaide arshtâtemca frâdat-gaêthãm varedat-gaêthãm ýazamaide.


8. dadhvånghem ahurem mazdãm raêvañtem hvarenanguhañtô ýazamaide ameshâ speñtâ huxshathrâ hudhånghô ýazamaide.


9. âtrem ahurahe mazdå puthrem ýazamaide hvarenô mazdadhâtem ýazamaide savô mazdadhâtem ýazamaide airyanem hvarenô mazdadhâtem ýazamaide ukhrem kavaêm hvarenô mazdadhâtem ýazamaide, âtrem ahurahe mazdå puthrem ýazamaide kavaêm haosravanghem ýazamaide vairîm haosravanghem ýazamaide asnvañtem gairîm mazdadhâtem ýazamaide caêcastem vairîm mazdadhâtem ýazamaide ukhrem kavaêm hvarenô mazdadhâtem ýazamaide, âtrem ahurahe mazdå puthrem ýazamaide raêvañtem gairîm mazdadhâtem ýazamaide ukhrem kavaêm hvarenô mazdadhâtem ýazamaide, âtrem ahurahe mazdå puthrem ýazamaide âtarsh speñta rathaêshtâra ýazamaide ýazata pouru-hvarenangha ýazamaide ýazata pouru-baêshaza ýazamaide, âtrem ahurahe mazdå puthrem ýazamaide vîspe âtarô ýazamaide xshathrem nafedhrem nairyô-sanghem ýazatem ýazamaide.


10. âpô vanguhîsh mazdadhâtå ashaonîsh ýazamaide aredvîm sûrãm anâhitãm ashaonîm ýazamaide vîspå âpô mazdadhâtå ashaonîsh ýazamaide vîspå urvarå mazdadhâtå ashaonîsh ýazamaide.


11. hvarexshaêtem ameshem raêm aurvat-aspem ýazamaide.


12. månghem gaocithrem ýazamaide gaom aêvô- dâtahe urunô fravashîm ýazamaide gaom pouru-saredhahe urunô fravashîm ýazamaide.


13. tishtrîm stârem raêvañtem hvarenanguhañtem ýazamaide satavaêsem frâpem sûrem mazdadhâtem ýazamaide vîspe stârô afshcithra ýazamaide vîspe stârô zemascithra ýazamaide vîspe stârô urvarô-cithra ýazamaide vanañtem stârem mazdadhâtem ýazamaide aoe strêush ýazamaide ýôi hapta haptôiriñga mazdadhâta hvarenanguhañta baêshazya paitishtâtêe ýâthwãm pairikanãmca.


14. gêush hudhånghô urvânem ýazamaide drvâspãm sûrãm mazdadhâtãm ashaonîm ýazamaide.


15. dadhvånghem ahurem mazdãm raêvañtem hvarenanguhañtô ýazamaide ameshâ speñtâ huxshathrâ hudhånghô ýazamaide.


16. mithrem vouru-gaoyaoitîm hazangra-gaoshem baêvare- cashmanem aoxtô-nâmanem ýazata ýazamaide râma hvâstrem ýazamaide.


17. sraoshem ashîm huraodhem verethrâjanem frâdat- gaêthem ashavanem ashahe ratûm ýazamaide.


18. rashnûm razishtem ýazamaide arshtâtemca frâdat-gaêthãm varedat-gaêthãm ýazamaide erezhuxdhem vâcim ýat frâdat-gaêthem ýazamaide.


19. ashâunãm vanguhîsh sûrå speñtå fravashayô ýazamaide.


20. amem hutashtem huraodhem ýazamaide verethrakhnem ahuradhâtem ýazamaide vanaiñtîmca uparatâtem ýazamaide.


21. râma hvâstrem ýazamaide vaêm ashavanem ýazamaide vaêm uparô-kairîm ýazamaide taredhâtem anyâish dâmãn aêtat tê vayô ýazamaide ýat tê asti speñtô-mainyaom, thwâshem hvadhâtem ýazamaide zrvânem akaranem ýazamaide zrvânem darekhô-hvadhâtem ýazamaide.


22. vâtem speñtem hudhånghem ýazamaide adharem ýazamaide uparem ýazamaide fratarem ýazamaide pascãithîm ýazamaide nairyãm hãm-vareitîm ýazamaide.


23. dadhvånghem ahurem mazdãm raêvañtem hvarenanguhañtem ýazamaide ameshâ speñtâ huxshathrâ hudhånghô ýazamaide.


24. razishtãm cistãm mazdadhâtãm ashaonîm ýazamaide daênãm vanguhîm mâzdayasnîm ýazamaide.


25. ashîm vanguhîm ýazamaide xshôithnîm berezaitîm amavaitîm huraodhãm hvâparãm hvarenô mazdadhâtem ýazamaide savô mazdadhâtem ýazamaide pâreñdîm raorathãm ýazamaide airyanem hvarenô mazdadhâtem ýazamaide ukhrem kavaêm hvarenô mazdadhâtem ýazamaide ukhrem ahvaretem hvarenô mazdadhâtem ýazamaide zarathushtrahe hvarenô mazdadhâtem ýazamaide.


26. arshtâtem frâdat-gaêthem ýazamaide gairîm ushi-darenem mazdadhâtem asha-hvâthrem ýazatem ýazamaide.


27. asmanem hvanvañtem ýazamaide vahishtem ahûm ashaonãm ýazamaide raocanghem vîspô-hvâthrem.


28. zãm hudhånghem ýazatem ýazamaide imå aså imå shôithrå ýazamaide gairîm ushi-darenem mazdadhâtem asha-hvâthrem ýazatem ýazamaide vîspå garayô asha-hvâthrå pouru-hvâthrå mazdadhâta ashavana ashahe ratavô ýazamaide ukhrem kavaêm hvarenô mazdadhâtem ýazamaide ukhrem ahvaretem hvarenô mazdadhâtem ýazamaide.


29. mãthrem speñtem ashhvarenanghem ýazamaide dâtem vîdôyûm ýazamaide dâtem zarathushtri ýazamaide darekhãm upayanãm ýazamaide daênãm vanguhîm mâzdayesnîm ýazamaide zarazdâitîm mãthrem speñtem ýazamaide ushi-darethrem daênãm mâzdayesnîm ýazamaide vaêdhîm mãthrem speñtem ýazamaide âsnem xratûm mazdadhâtem ýazamaide gaoshô-srûtem xratûm mazdadhâtem ýazamaide.


30. anakhra raocå hvadhâtå ýazamaide raoxshnem garô nmânem ýazamaide misvânem gâtûm hvadhâtem ýazamaide cinvat-peretûm mazdadhâtãm ashaonîm ýazamaide berezañtem ahurem xshathrîm xshaêtem apãm napâtem aurvat-aspem ýazamaide apemca mazdadhâtãm ashaonîm ýazamaide haomem zâirîm berezañtem ýazamaide haomem frâshmîm frâdat-gaêthem ýazamaide haomem dûraoshem ýazamaide dahmãm vanguhîm âfritîm ýazamaide ukhrem taxmem dâmôish upamanem ýazatem ýazamaide, vîspemca ashavanem mainyaom ýazatem ýazamaide vîspemca ashavanem gaêthîm ýazatem ýazamaide.
[ashâunãm vanguhîsh sûrå speñtå fravashayô staomi zbayemi[[2]] ... verethrakhnat!!!]

 

 

 

 

 

 

 

[PAST . PRESENT . FUTURE]

© Copyright 1998-2007  PersianDNA  All Rights Reserved.